طول عمرى وانا ساكت وانا راضى
يزيد همى اقول لازم اكون هادى
ولو توصل فى يوم للدم يكون عادى
قولولى ازاى اقول لأه لأسيادى
أنا ماشى وجنب الحيط بقالى سنين
وأيه يعنى ومن غير ذنب آخد قلمين
ولو يرمونى جوه السجن أقضى يومين
مسيرى أخرج وروح أموت بين ولادى
ماهوش نافع لنا مظاهرات ولا اضراب
ولا نزعق بعلو الصوت دى عيشة هباب
لأن ده فى عرف (العقل) بقى ارهاب
ودى الفولة فاهمها كل ديموقراطى
زمننا زمن تلاقى فيه الخطر بالكوم
على القهوة كلامك لو ماهوش مفهوم
هيتفسرفى المكان اياه ومين ح يلوم
ده على المكتب بلاوى كتير وبتنادى
لكن ارجع واقول يا واد بتشتكى ليه
ده عهد سعيد اكيد غيرك بيحلم بيه
يا خى سامحنى ولا تلومنيش وهعمل ايه
ولو جالى يا ناس على البيت سعادة البيه
لامم من القسم كام واحد كمان حواليه
هدور على اللى يقف جنبى الاقى فاضى
هناك تعليق واحد:
والله العظيم جامدة
إرسال تعليق